"Jetari" vepër e shkrimtarit Kristaq F. Shabani

Duke punuar 20 vjet në rrethin e Tepelenës ndjehem jo pak dhe tepelenas dhe i di cilësitë dhe hallet e shumta të këtij rrethi. Tepelenasit ambiciozë dhe bujarë meritojnë përkujdesjen e vëmendjen e përkushtuar të shtetit e të institucioneve dhe timen ca më tepër, që dora e ngrohtë dhe e fortë e shtetit të jetë aty e pranishme. Në gjeografinë dhe historinë e Qarkurt tonë, Përmeti është si ai livadh i butë që do të ndihej shumë po t’i mungonte këtij rajoni, të cilit i shton një përmasë të nevojshme, ashtu siç një detyrim më shumë për t’iu përgjigjur kërkesës së tij të matur e fisnike për më shumë investime e politika zhvillimore.

Ardhja në këtë detyrë nga radhët akademike më shton detyrimin që të aktivizoj dhe respektoj më shumë mendimin intelektual në të mirë të zhvillimit të rajonit. Përvoja e mirë e krijuar në Prefekturë në drejtimin e mikut tim Llanaj do të jetë një bazë e shëndoshë për këtë.

Synimet tona do të jenë për sigurimin e një qeverisje, që shkon sa më afër shtetasve nëpërmjet njohjes së ekzistencës së identiteteve dhe vlerave të ndryshmetë bashkësive. Unë vij nga radhët e partiakëve, por nuk vuaj nga militantizmi dhe gjëja që pranoj më pak është presioni militant. Ndihem i lehtësuar e optimist në realizimin e detyrës sime, kur njoh dhe vlerësoj potencialet intelektuale e përvojën tuaj të gjatë që shpresoj të jetë e njëjtë me atë të kolegëve e bashkëpunëtorëve të mi, në bashki, komuna dhe administratë do të garantojmë një bashkëpunim të frytshëm miqësor dhe produktiv.

Nuk mund të mos i drejtohesha me ndjenjat e miqësisë dhe respektit njerëzve të medias, që kanë kontribute të çmuar e të vlerësuara në nxitjen e faktorëve të progresit në rajonin tonë e t’u kërkoj bashkëpunim të sinqertë e marrëdhënie të sinqerta mirëkuptimi. Doja të përcillja përmes tyre te qytetarët mesazhin e një dëshire e përgjegjësie të madhe nga ana ime për të realizuar siç duhet ato që jashtë karriges së prefektit i kam dëshiruar dhe vetë si qytetar i thjeshtë.

(Vasil Bicin në detyrën e Prefektit e prezantoi zv/ ministria e ministrisë së Pushtetit Vendor dhe Decentralizimit znj. Natasha Paço).

Kishte vetëm pak ditë që kishte marrë detyrën dhe në intervistën e mëposhtmne shfaqet me një aftësi të madhe racionale, si një profesionist i vërtetë, i prerë për të bërë detyra të mëdha, i dallueshëm nga të tjerët, thua ishte i përgatitur jashtë vendit, kjo nga që kishte përgatitje shumëplanshme, duke u marrë edhe me probleme, që, shpesh herë, nuk u kalojnë nëpërmend ‘funksionarëve”. Ai kishte synim të operonte me bisturi dhe të shëronte. Jo pa qëllim përmend disa herë administratën në prefekturë me shije “jo profesionale”, e vendosur me particizëm ekstrem, pa motivim e konkurrim. Ai kishte ëndërr të bënte një ndryshesë të tillë, por… Menteshat e disave janë të salduara…

Intervistë

Një administratë pranë problemeve të qytetarëve? Kjo është tradita e hershme e të majtës politke.

Ju erdhët në detyrën e prefektit nga qarqet akademike e universitare. Si evlerësoni administratën?

Ndjehem si prefekt dhe shpesh harroj dhe përkatësinë partiake. Edhe jashtë kësaj detyre, unë jam ndier pjesë e një misioni të maxhorancës së majtë për të ushtruar përgjegjësitë dhe për të përmbushur premtimet përpara komunitetit. Disa poste të Partisë Socialdemokrate (PSD) në të gjitha nivelet, nuk janë privilegje, dhuratë apo lëmoshë konjukturale. Është një normalitet i nevojshëm dhe i dobishëm. Partia Socialiste me Partinë Socialdemokrate përbëjnë boshtin kryesor të Koalicionit të Integrimit. Me këtë pikëvështrim, po e shikoj edhe aktivitetin e administratës. Dëshiroj që me këtë optimizëm e përkushtim profesional t’i realizojmë detyrat e punët e mira për komunitetin.

A ka xhelozi te aleatët tuaj për këtë detyrë?

Mendoj se jo. Unë nuk vij në këtë detyrë rastësisht. Secili ka investimin e tij politik, intelektual dhe njerëzor. Konkurrenca brenda së majtës i ka bërë mirë vetvetes, ndërsa më tej është koha e punës dhe jo e gunës. Jam mësuar me konkurrimin dhe e vlerësoj veten si produkt të tij. Koha e qeverisjes nga e majta do të jetë e gjatë dhe besoj se gjithkush do ta ketë avantazhin e konkurrimit.

Cilat janë vështirësitë e para?

Janë të shumta, por lehtësisht të kapërcyeshme. Qarku i Gjirokastrës, më tepër se specifikë vështirësish, ka specifikë “lartësish”, pasi ka male që kanë shumë maja e këto maja duhen kapur. Këto maja janë kudo në kulturë, mentalitet, vizione, mënyrë jetese, ambicie progresi, pasuri intelektuale e tjerë.

Mendoni se programi qeverisës po zbatohet në nivelet e kërkuara në Prefekturën e Gjirokastrës?

Përgjithësisht po. Në se do t’i marrim një nga një treguesit do të thoshim se jo vetëm infrastruktura e jashtme po plotësohet, por edhe infrastruktura e brendshme funksionale e organizmit, administrimit, e drejtimit të komunave dhe bashkive po përmirësohet në forcim të shtetit ligjor, në ndërgjegjësim për një administratë bashkëkohore në shërbim të komunitetit. Kuptohet ka dhe reminishenca nga e kaluara e largët dhe e afërt që bëhen dukuri korruptive, militantizmi, paaftësie etj. Megjithatë nuk mund të mos ndjehet ndryshimi në filozofinë e qeverisjes vendore, decentralizimi dhe përgjegjësia përpara qytetarëve. Programet e shumta të zhvillimit, sidomos në infrastrukturën rrugë, kanalizime, ujësjellësa etj. I ka dhënë një frymëmarrje tjetër kësaj qeverisjeje, së bashku me procesin e decentralizimit.

Si prefekturë kufitare, cilat janë disa nga përfitimet në kuadrin e projekteve të BE për rajonet ndërkufitare?

Po e ndjekim me mjaft interes këtë raport me fqinjin tonë jugor dhe organizmat evropiane. Po punojmë për zbatimin e programit INTERREG 3/A Shqipëri – Greqi, në bashkëpunim me Ministrinë e Ekonomisë. Kjo e fundit ndjek këtë program në bashkëpunim me shtetin grek. Nga ky program ende nuk kanë filluar financimet, edhe pse janë paraqitur projekte prioritare. Këto prioritete janë përcaktuar në bashkëpunim me OJQ e rajonit, Dhoma e Tregtisë dhe Universitetin “Eqrem Çabej”.

I rikthehemi edhe njëherë pyetjes së parë. Si e vlerësoni administratën publike?

Jam në fillim të punës time dhe e vlerësoj ende si atëherë, kur isha qytetar, që shpesh edhe nervozohesha, kritikoja, kërkoja që gjërat të ecnin më shpejt e tjerë. Shpresoj se do të mbetem kështu deri në fund e nuk do të “sëmurem” nga zyrat. Por them se ka shumë për të bërë. Ka mungesë racionaliteti, kohë të humbur kot, sorrollatje, mosnjohje kompetencash, kompetenca evazive, ligj e të pambaruara që e çojnë me shumë vonesë “hakun tek i zoti”, duke kaluar në shumë pengesa dhe vështirësi. Ka gjithashtu edhe një administratë të pamotivuar sa duhet, që nuk është përzgjedhur mbi kritere profesionale të mirëfillta.

A do të thotë kjo se do të realizoni reformën e duhur në këtë administratë?

Me fjalën reformë është abuzuar rëndë. Jo vetëm në pikëpamje administrative, politike dhe gjuhësore. Shpesh ajo është kuptuar si zëvendësime partiakësh e militantësh të ndryshëm partish. Unë do të bëj një reformë të tillë. Si prefekt, por edhe si akademik, jam mësuar të çmoj vlerën e mirëfilltë intelektuale dhe profesionale. Edhe ata që opinioni i quan partiakë, do t’i vë në punë, do t’u jap shansin që të provojnë epërsinë e forcës politike që i ka sjellë në administratë. Nëse nuk do ta kalojnë dot “provimin” e përgjegjësisë zyrtare dhe të kërkesave të qytetarit, ata do të lihen të lirë të ushtrojnë aktivitetin partiak jashtë administratës shtetërore.

Marrë nga gazeta “Dita” e diel, 21 mars 2004, intervistë e Prefektit të Gjirokastrës, Vasil Bici: “Qëllimi ynë, t’u qëndrojmë sa më pranë problemeve të komunitetit” dhënë gazetarit ODISE KOTE.

###

U takuam një ditë tek familja Vito, ku na kishte “lënë” Fotografi i madh që fiksoi historinë e Gjirokastrës, por edhe më gjerë, Filip Vitoja, njeriu që

shkroi me “dritë” bashkë me të tjerët e mëdhenj të Zagorisë sonë. Unë kisha shkruar për Filip Viton te “Intelekt 2001…” 2. Kisha lidhje familjare. Nëna ime dhe ai ishin kushërinj të parë. Vasoja, i cili ishte shumë serioz në nderimet në fatkeqësi edhe në gëzime, po ngushëllonte familjen. Në atë çast Viktori, djali fotograf i talentuar i fotografit të madh, po na tregonte për ngushëllimet që kishin ardhur nga përfaqësuesit e shtetit. Kur mbaroi Viktori, Vasua, tashmë në funksion të Prefektit, m’u drejtua mua duke më thënë: “Poet, (kështu më thërriste gjithmonë) duhet të shikojmë mundësinë që të bëjmë një shkrim të madh për fotografin e nderuar…”.

“Ajo nuk diskutohet,” - i ktheva përgjigjen.

***

I guximshëm, vizionar prefekti i ri. Kudo që mori pjesë gjatë muajit të tij të veprimtarisë në Prefekturë, tregoi aftësinë e tij intelektuale, trajtesën e problemeve me një këndvështrim tjetër. Gjirokastra, Tepelena dhe Përmeti ndjenë nga afër se në krye të Prefekturës së Qarkut kishte ardhur një profesionist i denjë për këtë post, një politikan i moderuar.

Tepelena e ndjeu në fjalimin që mbajti për përvjetorin e krijimit të grupit të Bënçës; Gjirokastra në mbledhjet e analizave për KESH dhe në pjesëmarrjen aktive për diskutimin e buxhetit të Bashkisë së Qytetit të Gjirokastrës, ku mbrojti me dinjitet kulturën, Artin, Teatrin, Universitetin, duke e shprehur katërcipërisht se tani kishte ndryshuar gjithçka dhe nuk mund të luhej me kulturën dhe pasurinë shqirtërore. Debati i argumentuar ishte karakteristikë e prefektit të ri. Vital, energjik, mbushamendës rriste figurën e tij në popull.

Përshëndetje në 35 vjetorin e grupit të Bënçës

14.03.2004

Pas fjalëvetë bukura poetike e të ndiera të artistëve, fjalët zyrtare ngjajnë të fshehta. Megjithatë dhe ato kanë vendin e tyre. Është sot një ditë e gëzuar, kur shikon të kthyer në ditë feste një përvjetor të shënuar të një ansambli folklorik, të radhitur në gjerdanin e artë të folklorit shqiptar, që për 35 vjet s’reshti së buruari vlera të papërsëritshme të një game të pashterur të traditave të spikatura kombëtare.

Bënça që e lindi duket sikur s’kishte më fuqi ta mbante brenda hapësirës së ngushtë të saj këtë grup dhe ia dha Tepelenës për ta formëzuar më tej e për ta ndriçuar në përmasat e plota të një përpunimi elegant e bashkëkohor, që do të kthehej në një polifoni karakteristike me tipare individualisht të dallueshme.

Shpejt grupi i Bënçës u bë i njohur, i dashur e i kërkuar, duke forcuar fizionominë e tij e skalitur profilin e veçantë të një gjetje folklorike të përhapur në llojin e saj dhe të papërsëritshme në mesazhet që transmetohen; gradualisht grupi dominoi në variacionin polifonik lab të Tepelenës dhe fitoi qytetarinë e kthimit në simbol të këngës labe në Tepelenë, ku s’qe e lehtë të evidentohej në atë shumllojshmëri folklorike, që bartte kjo trevë e pasur me prurje polifonike befasuese.

E gjitha kjo, falë protagonizmit të shfaqur dukshëm të interpretuesve kryesore të saj, ku veçohen marrësit virtuozë: Golit e Paro, të cilët u bënë unikë e të paimitueshëm në melodinë e tyre të shpërthyer, të ëmbël, impresionuese e me ndikim të drejtpërdrejtë estetik.

Kënga e tyre ushqeu ndjenjat e mijëra dashamirëve dhe fansave, mobilizoi energjitë e mijëra njerëzve dhe frymëzoi e edukoi më tepër se një brez me brendinë e shëndoshë e harmoninë e përsosur të vargut shkëmb e barut, lule e trëndelinë, shkrepëtinë e flamur, që u stis në përpjekjet e shumë rapsodëve tepelenas, midis të cilëve do të kujtoja e veçoja Dhjamano Ballanon, Maliq Lilen e tjerë.

Ju përmendët këtu episode domethënës e persona të shumtë kontribues, vlera të evidentuara e ndikime pozitive, veprimtari të memorizuara e të sukseshme e këngë – perla, që kanë bërë histori në ecurinë e këtij grupi, në jetën e qytetit dhe atë artistike të veçantë të vendit.

Grupi i Bënçës është një nga krenaritë e shumta të Tepelenës, është përmasa lirike më e dukshme e saj, që do të mbetet edhe për shumë vite një iso e gjatë, që do të përshkojë ëmbël dhe më tej jetën e këtij qyteti me nerv luftëtar e burrëror artistik.

Grupi i këngës së re qytetare të Tepelenës, që po ravijëzon një portret të veçantë e simpatik kohët e fundit, duket sikur kërkon të rivalizojë në plotësim atë traditë pjellore të kujtuar me aq sukses nga grupi i njohur i Bënçës.

Unë bashkoj me Ju urimin për jetëgjatësinë e përvjetorëve të këtij grupi duke përgëzuar organizatorët dhe duke uruar shëndet, jetë të gjatë e punë të paprerë për këngëtarët e shquar të grupit që emrin e tyre e vunë me dinjitet në fondamentin e ndritur të traditës dhe historisë së Tepelenës.

U buroftë kënga lumë e u paçim sa më gjatë në skenë, tashmë edhe me të rinj që do të vazhdojnë polifoninë tuaj për të përjetësuar atë e për ta ulur edhe në tryezat e gëzimeve e të gostive popullore. Edhe 100 vjet me këngë në buzë.

Faleminderit!

Përshëndetje në përurimin e Odës Vllahe

Andon Poçi, 20.03.2004

Duke ju falenderuar për kënaqësinë, që më dhatë në këtë aktivitet të veçantë e të bukur, ju përshëndes e ju uroj mbarësi e suksese në misionin tuaj fisnik, përmbajtjen gjallë të traditave, të kulturës e të aktivitetit tuaj.

Komuniteti juaj vllah ka treguar ato përmasa të nevojshme sociale, kulturore të një integriteti që i kanë lejuar bashkëjetesën normale me shqiptarët e që kanë prodhuar një bashkëpunim e inkuadrim paqësor, pa qenë nevoja e pa u ndierë rreziku i asimilimit.

Në integrimin tuaj ka funksionuar modeli ndërkombëtar, si një veprim që siguron arritjen e mundësive të barabarta në zhvillim, ndërgjegjësimin e dyanshëm në pranimin e ndryshimeve etnokulturore e të statusve me individualitet të ndryshëm, solidaritetin që shmang pabarazinë e padrejtësinë sociale, respektin për tjetërsimin kulturor të njëri - tjetrit në dobi të unitetit të bashkëjetesës dhe çlirimin nga paragjykimet etnike që lehtësojnë komunitetin mes komuniteteve.

Në kushtet e sotme të krijimit të mundësisë për lëvizje të lirë, shoqata juaj ka shfrytëzuar mirë kërkimin e vlerave, që do të përbënin bazën për krijimin e një tradite të re në përshtatje me interesat dhe kushtet e reja social - ekonomike. Në këtë rrugë ju po gjeni vetveten dhe Komuniteti i rajonit tonë ju shikon me respektin dhe mbështetjen e duhur, pasi ju vetë, me punën dhe qëndrimin tuaj, jeni shkrirë në mënyrë të natyrshme në Kostitucionin shpirtëror të kësaj treve, duke ruajtur me fanatizëm identitetin tuaj kulturor.

Duke ju përgëzuar dhe njëherë për prosperitetin dhe këmbënguljen tuaj të admirueshme në evidentim të vlerave Vllahe, ju uroj punë të mbarë e sukses në të gjitha fushat për të lartësuar emrin dhe kontributin tuaj në gjithë jetën e vendit.

Gëzuar! Ju faleminderit!

» Në fron “Jetari” : Ali Podrimja... Nga Kristaq F. Shabani
» Interviste e poetit Kristaq F. Shabani
» GJIROKASTRA : KRISTAQ F. SHABANI, BASHKEPUNETOR ABI, USA
» Metafora e “luleve” nga Kristaq F. Shabani
» "Kur lind Nënta" nga KRISTAQ F. SHABANI