NESËR - MUND TA KUPTONI - Ferit RAMADANI

24.(Vizioni i shtrirjes)

Halle të papara përfëshijnë ardhmërinë
në kuptim lajmërimesh përmbushen
sekretet e dëshirave!

Në sallë operacioni plastik i shprehjes
ka lindur binjakët e shterpësisë
në barazpeshat e ditëve trishtuese!

Prej nga u ngrit ky pirg
ku presin padurim të shohin shenjtërinë
e të përmbushin suazat e hiçit!

Qytetërimi shterp ka shumë nevojë
për lindje, karrierë e modë,
dhe aksidente trafiku domosdo!

Flaka, 9-10 dhjetor 2000

25.(Ritmi i synimeve)

Në vërejtje forumesh brendia
kërkon zgjidhjen e shpresave
njerëzimi - në guacën e pakënaqësisë.

Në adresë të gabuar trokitën lajmet
të zgjuarit ranë në gjumë
dhe kurrë s’u zgjuan!
Në vendin e punës grykat
janë dëshmi marramendëse
paaftësitë bazë reale krijimi!

Ç’është arritur nga vetëdia
vazhdimësinë e jetës drejton
në strukturë hapash s’vendnumëron!

Flaka,8-9 korrik 2000

26.(Objektivat e shprehjes)

U lëshuan mbi shenjat e ndërrimeve
dhe lindën në shesh të rritjeve
për reflekse motivesh verbuese!

Periudhë e marrë në parcela
ia priste krahët shpirtit, begatisë
të rrënjoste katandinë!

Në burimin e rrjedhave fjalët shterrën
kuptimi dyfish u ngrit obligim
heshtja për liri - kthesë arritjeje!

Ç’është paraparë të mirret për vetkënaqësi
jetësohet në megalomani,
objektiva e shprehjes - shmanget!

27.(Selia e shpërfilljeve)

Përvoja e re gjymtyrët rrënoi
përbërje asgjësimi - derdhi në ardhmëri,
krahu i zezonës t’i pushtojë!

U zgjua rrëmuja e proceseve
teknologjia e klithmave, shestimeve!
Jeta e ndotur - filtrohet!

Në ente risi për investime
kapitali i mospërgjegjësisë për shfrytëzim
godiste përpjekjet e lirisë!

Monopoli i dominimit përvojë kohe
ku hyjnë e dalin turistë obligimesh,
orari i ndërgjegjes seli shpërfilljesh!

Flaka , 9- 10 dhjetor 2000

28.(Detaj skicash)

Dëshprimi u kthye në shenjë komentesh
epi i shfrimeve dhe durimit
kurrë s’u nis nga filli.

Një udhë humbi në mendime
udhëtarët u ulën të prehen në zbulim
ku qendra e ngjarjes i shfaqi largësitë!

Shërbimet u shqetësuan, gotat u zbrazën
për shëndet të nisjes s’u dha dhuratë
për mirëseardhje adresa e gabuar!

Nga do t’ia mbajnë :Jug e Veri, Lindje , Perëndim
Kjo është anësia :
që diçka zbulon e fsheh njerëzia!

Flaka, 8-9 korrik 2000

29.(Skena serike)

Mbi glob është rivendosur aktrimi
i Shekullit të Ri
pa qëllim dilemash e zgjidhjesh.

Përtrihen samitët, liderët djersohen
Shekulli njëzet rrumbullakson porositë
që flaken në transmetime!

Në diplomacitë e heshtjes misteret arritën
ku bërthama e drejtësisë -
mbjell ide për dritën!

Mirëkuptime për punën s’gjen urtia
arti zverdhet nga liria e shprehjes
djersa - skenë serike në synime!

Flaka, 26 - 27 shkurt 2000

30.(Rekordi i rënieve)

Panorama e nisjes është ndalur në pikëpyetje
kurrë s’këputet -
zinxhiri fatal i shqetësimeve!

Nga çështje të papritura lindën
aksione lidhjesh e përzierjesh
për cikël mbështetjesh të rrënuara!

Deti përcjell tallase mbi brigjet plot rrudha
duartrokit heshtja -
se bijnë e ngriten qëndrimet!

Me zjarr në gji aktori vallëzon dhe vdes papritmas
duartrokit publiku për notin e përmbytjeve
- koha s’ndryshon!

Flaka, 26-27shkurt 2000

31.(Nënshkrimet e marrëveshjes

Në theks të pakuptimeve
është ngritur pluhur rreziku
se bie oreksi për lajmet e urtisë!

Çdo gjë ndodh jashtë mundësive
realja s’shifet , s’matet
dioptrisë së dritës i thyhen pamjet!

Dikund buzëqeshja vret e pret,
marrëzia e djallëzisë ngritet në Kala
- dashuri në mbështetje kurthash!

Në rikthesat e fatit për pasuri
lojërat e fatit s’pushtohen
pa nënshkruar marrëveshjet!

32.(Rituali i lutjeve)

Vizioni paqë -
çdoherë rri drejtuar në padukshmëri
se: fati dikund është shkruar!

Përpara çdo dhurate është përkulur
si shtatore që kujton kundërshtitë -
në epshe të gjymtyrëve!

Kanë marrë hije për pozë verbësie
të ngriten trazim kohësh
për paisje mode e luksi fals!

Në ditarin e zbrazëtive për pritje motmotesh
janë gëzuar për acarin, tufanin
dhe shterpësinë e përherëshme të urimeve!

Flaka, 9-10 dhjetor 2000

33.(Pozita e ndërrimeve)

Në linjat e heshtjes u rritën
konstrukte emërimesh për korniza
harmonitë e prehjes hynë në pritë!

Në stilin e kërkesave rizgjohej
frymëzimi i mrekullive parakalim
mbi gërmadha rrënimesh - kushtrimi!

Përkushtimi për unin e krijimit
akt për kënd vështrimi
të mposhten mizoritë!

Në kufirin e hamendjeve
llogaritë pa urti në kthesa
në rrjedha - rilindjeta!

34.(Konflikti i vendosjes)
Në manovrat e aktrimit aktorët -
brendinë e shpirtit shpërthejnë
për nxitje ashpërsojnë dëshirat!
Karshi krahasimeve e paaftësive
dëshmi e ndërlidhur përpjekjesh
vetveten mohon - vetveten!
Në orientimin e saktësive
suksesi i mbyllur në sportelë
duartrokit pa bazë vullneti!
Paralajmërime për brenga e fjalë
në memecllëkun e humbjes -
nis shtigjet konflikti i vendosjes!

35.(përballimi)

Në logun e mendimeve u turrën
orët e pasditës s’u dolën
përqindja e re për rënie të mirëqenies!

Në shkallën e rritjes konsumi i tymit
është mbledhur në re
ku errësohet drita e të mirave!

Ç’ka mvaret për peshën e dobisë
ndryshimet e motmotit i dalin -
pengesë për nismë në plane!

Në kursin e dallimeve për vlerë
është ngritur gjërësia heshtje
në miniaturë - përballimi!

36.(Zerograda e stileve)

Është zgjuar nga jehona e tmerrit
për të aktruar përputhjet
pa kënaqësi në shije , në pamje!

Edhe ditëve drita u mungonte
edhe skenës pozita për aktrim
publiku - në mendime nënvizoi kuptimet!

Ku është thelbi i asaj që preket
rritet, ngritet, bie, lind e vdes
në agim shkaqesh e dështimesh!

Nga pluhuri i bindjeve për heshtje
në petkun e pakuptimsisë -
përcaktohet zerograda e stileve!

Flaka, 26 -27 shkurt 2000

37.(Idila e pritjes)

Për herë të parë dolën në log
të presin mendime, të japin mendime
dhe ngecën në hijen e pritjes!

Sa herë u zgjuan nga fshehjet
në analizë ecjet u shtruan
ku ngritej unaza e dobësive!

Ia falën hapat perifrazës për udhë
dhe kurrë s’u nisën të kalojnë
ku zgjatet vargani i përleshjeve!

Në urën e mendimeve u shtangën
aktruan shtrirë mbi shpinë
të përjetojnë dorëzimin!

Flaka, 9-10 dhjetor 2000

38.(Hapi i frenuar)

Pa leje për ta ngritur Kullën
mbi rrjedhën e mendimit
shprishën dashurinë për jetën!

Në rreth - misteri vërshoi
lirikën e shprehjes vetmi
ritmi i suksesit u shterri!

Në ngjyrat e blerimit
hodhën përcëllimën e brymës
vjeshta u shkarkua në skenë!

Në këngët e bilbilit
akordin e krra-krrave jetësuan uratë
dhe ngecën në rrugën e gjatë!

Flaka, 9-10 dhjetor 2000

39.(Paimet e këngës)

Për shumësi kuptimesh
u prehën mbi qëllime
të dalë e zëshme kënga!

Herrën fjalë e gjeste,
që përtypën në kuvende dollishë
dhe n’ëndërra duke fjetur!

Për ngritje ia falën pushtimet
lirikës për urtësi
të thjeshtojnë artin - madhështi!

Por subjekti u mungoi
dhe populli që këputi prangat
ndaj i mori era!

40.(Miratimi i rrjedhave)

Dita e parë e kursit
përfshiu përmasën e ndodhive
nga thashethemet u varën krijimet!

Në degën e bleruar - mallkimet
kërkuan vizitën kolektive
për buzëqeshje të ballsamosura!

Pa shtekdalje në shtigje
befasi në rrjedha e prita,
këngët u zverdhën në gjymtyrë!

Në rënie të shtypjes ndodhitë
u ringjallën në grindje
miratimi i shprishjes tronditet në damarë!

41.(Kuadri i ngritjes)

Në gatishmërinë e shprehjeve ndihmonte
shqetësimi i mbuluar nga kurreshtja
se porositë nisen në rekomandim!

Në ç’mundësi zu biseda të shëtisë
terreneve - pa leje besimi,
aktori luan në rolin befasi!

Vogëlushët buzëqajnë në mes të rrugës
me përdëllimë shprehin ankthe çrregullimi
derdhin lotët margaritarë drite!

Pastaj - kumtesa tronditi skenën e ngjarjeve!
-Lindën Ana Frankë për portrete;
-Shota, Sulltana, Nurie , Ylfete...!

42.(Hermetika e kuptimit)

Ku ngec e s’del në pritë
pikënisja e përcaktimit për kohën
ia rrëmben buzëqeshjen urtisë!

Është mbyllur në vetvete si guaca
përkrah projektet e pakënaqësisë
për dritën - zjarrin e dashurisë!

Në frontin e fjalëve qëndrimi
merr pozitë për grusht, për sulm,
jehona e këngës pa kulm!

Në përsosje i prin rënia
deformimet në brendinë praktike
anatemë e ngjyrave mistike!

Flaka , 26- 27 shkurt 2000

43.(Miratimi i rrjedhave)

Është shtuar pakënaqësia për shpresa
për ringjallje që hyjnë si pozë,
për sjellje vandalësh , nervozë!

Herë- herë ditët pagëzohen për afrime
përgjigjet marrin dështime
kundërshtitë mbesin pa zgjidhje!

Njeriu i ri i këtij nënqielli
sapo vjen e niset në jetën mister
ku dalin në pritë shqetësimet!

I prek ndjenjat e ndyn hapësirën
në varshmëri të hapave prish takimet
Don Kishot që bekon mallkimet!

44.(Mënyra e nisjes)

Në pjesëmarrjen e përpjekjeve, mbështetjeve
ndërsjellje përcaktimesh në parime
ku lindin e ngriten qëllimet!

Në vazhdimësi të harmonive jehonë
i bëjnë hapat e heshtjes
në gatishmëri të rënieve!

Subjektet substancë amorfe
palë konfliktesh që lidhin nyjet e krizës
për të ngritur pluhurin e marrëveshjes!

Bie erë coftinë! Natyra e ndotur!
Ngërdheshet nga propozimet moti
se do të lahet nga rrëmeti!

45.(Greva e ndaljes)

Në shprehjen e rrjedhave parakalimi
procesin e rolit - për dramën e jetës
e ç’ montoi për hap në udhëkryqe!

Blerimi mori zjarr nga rrufetë!
Në theks të ndodhive u ndal urata
pushoi në zgafella misteresh!

Me dryrin e përmbylljeve kurthohen
në mospërfillje lidhin nyjet e idesë,
interesi i rënies artikuloi ecjet!

Në rregullat e sjelljes vetëvrasjet
shtruan krahët e mendimeve
vendnumërime në rrjedha!

47.(Kostum shprehjesh)

Për paraqitjen e shkaqeve janë prerë
për shtrirjen morale, të qëndresës , dashurisë
nga gjiri i popullit kanë pi!

Damari i tokës i ngjyrosi me pamje
të dalin në rrjedhat e kërkesave
ku kthehen të humburit e të humburve!

Njësi e caktimeve është shpallur
për afate pasojash e vendimesh
parim për mëkëmbje pa ligësi!

Megjithatë s’ është ngritur në rend
paranadalimi i lajkave kërkonte tabanin
në kohë të pakohë për shprehje!

48.(Trendi i etjes)

Ua lejuan lojën e bukur të fjalëve
për të hapur burimin e shterpësive
dhe arti të zverdhet nga thatësitë!

Repertoari i vlerësimeve shfrim
kobjetë çështjesh pa zgjidhje
në mëdyshje aktrimi ka rënë!

Në përgjigje diametri i domethënies
kohë kërleshjeje është zbuluar
se rrugët përmbyllen nga etja!

Përhapen intrigat, shndërrohen mirësitë
në stile goditjesh dhe shijesh për helmim
jehonë që deh rrjedhat e jetës!

49.(Larmia jubilare)

Për faqen e botimit kanë nxituar
për ngritjet, rritjet në qarkullim kanë hy
të mbesin domethënie e etjeve të brendive!

Në larminë e temës janë mbështetur
se fjala aktron për të vrarin shpend
dhe idilën e njohur të idesë!

Në ditarin e shënimeve për blerimin
kthesa e kronikës për histori
e gjeti shkakun për vdekjen e stinëve!

Pikëpamje për dritën , për shpresën
s’është dhënë se si vjen agimi
çdo gjë mbështetet në synime!

Flaka, 9-10 dhjetor 2000