MEHMET BISLIMI - STINË E VONUAR

Titulli: Re: MEHMET BISLIMI - STINË E VONUAR Sun Oct 19, 2008 7:12 pm

AI VDIQ
Pak rëndësi ka në së vdesim
Rëndësi ka në së do jetojmë
Në përjetësi
Futur meritueshëm
Mënyra e të perceptuarit
Për mes veprës së njeriut
Që rrugë ndërtoi
Ne
Si kalimtarë
Thjeshtë numra njerëzish
Që rrugëtojmë
Nga dera e botës së madhe
Pa dyshim
Hynë e dalin
Emra që lënë gjurmë
Por edhe anonim
Si gjithmonë

Titulli: Re: MEHMET BISLIMI - STINË E VONUAR Sun Oct 19, 2008 7:12 pm

DIRIGJENT
Orkestër që dështoi para akordimit
Tingujt e çakorduar
Fatkeqësisht
Nuk nxorën melodinë e shumë pritur
Çfarë peripecish kakofonie
Mes tingujsh ulëritës
Këtë konfliktualitet notash
Kush e dirigjon
Të dirigjosh një orkestër
Ti
Do duhej të ishe
Të paktën Maestro
E klasën e parë të notave
Nuk e kalove dot
Maestro i melodisë
Pa nota
Maestro kot

Titulli: Re: MEHMET BISLIMI - STINË E VONUAR Sun Oct 19, 2008 7:13 pm

BARI I PRERË
Dikur
Kur preja barin me kosë
Shtatin mbaja mjeshtërisht e ngatë
Që të priste kosa më lehtë
E mos të më zinte e përdredhura në shtat
Prerje me drapër prerje me kosë
Prerje me thikë prerje me shpatë
Mbi barin e tokën
Mbi njerëzit pa fat
Armiqtë i prenë me përdredhim
Prapa shpinës
Tokat e pëlleshme
Të atdheut tim

Titulli: Re: MEHMET BISLIMI - STINË E VONUAR Sun Oct 19, 2008 7:13 pm

TË BRAKTISUR
Mbështetur në gjoksin e fatit
Në dremitje që të dy
Fati dhe ai
Të dy të humbur që moti në soditje
Rrugëve të ndjenjave të braktisura
Me shpresa zhgënjimi nën sqetull
Në kërkim të një strehe tjetër
Të një strehe të vjetër
E të braktisur
Në dyert e tuja kush troket
Veç ai
Dyer të lëna
Në prehrin e braktisjes
Të lëna shkret

Titulli: Re: MEHMET BISLIMI - STINË E VONUAR Sun Oct 19, 2008 7:14 pm

ME TË BARDHA
Shpesh herë të shoh si të vdekur
Me të bardha mbuluar
Shtrirë në arkivolin e drunjtë
Me të zeza rrethuar
Ty dhelpër e blinduar
Kur meditimi më ikën
Ti ende gjallë
Një ndyrje e kësaj bote
Më shumë a më pak
Mes gjithë këtyre ndyrësive
Nuk merret vesh
Më pate thënë
Megjithatë
Ti vdekjen
Hak e ke

Titulli: Re: MEHMET BISLIMI - STINË E VONUAR Sun Oct 19, 2008 7:14 pm

NOSTALGJI
Për komunizmin e demokracinë
Për mbretin dhe perandorin
Për pashain dhe sheikun
Për besimtarin dhe laikun
Për injorancën dhe anarkinë
Në këtë rrëmujë të pa fund
Kush ma gjënë
Cilët qenë më horr
Me ke jemi në luftë
Nostalgjik i zhgënjyer
Me zemër në dorë

Titulli: Re: MEHMET BISLIMI - STINË E VONUAR Sun Oct 19, 2008 7:15 pm

VITET
Sa më shumë që po ikin
Aq më shumë po alarmohemi
Për ikjen e tyre
O kohë në pa kthim e cinike
Në vite
Për ballë të të madhit krijues
Imagjinatë letrare që gërryen
Në të pafundmin pus
Kush të refuzoi me kaq mospërfillje
Të parët tanë thoshin
Iku në pus të pafund
Ikje
Që të erdhi fundi diku

Titulli: Re: MEHMET BISLIMI - STINË E VONUAR Sun Oct 19, 2008 7:15 pm

OQEANET
Atje ku u bë flijimi
Ku gjurmët e gjakut ende janë
Mbi ballin e shkëmbinjve me rrudha
Ku legjendat vend kanë zënë
Mjeshtrit e restaurimit tek ty kanë ardhur
Duan legjendat t’i restaurojnë
Ashpërsi e legjendave
Reliefin e shkëmbinjve po tmerrojnë
Legjendat e Kosovës më nuk i takojnë
Vetëm Doruntinës
Që kalonin shtatë male e dete
Ato sot përtej oqeaneve
Kaluar po shalojnë
Mbi krihet e qiellit
Legjendat shqiptare
Fluturojnë

Titulli: Re: MEHMET BISLIMI - STINË E VONUAR Sun Oct 19, 2008 7:16 pm

SHPËTIMIN GJETI
Pak përgjegjësi etike
Për të gjallë
Sharjet nuk ia ndanë
Edhe ashtu
Ai vdiq
Së ngarenduri pas pasionit
Për pushtim
Të enigmës mbi kalanë e lavdisë
Gjë të zezë nuk lanë
Edhe mbi varr
Pa ia thënë
Kalanë e të sharave pavetëdijshëm ngriti
Edhe nesër dikush
Pas saj do të ngarendë në vrap
E shara nuk do të pushoi
Mbi uzurpatorët e lavdisë
Ky «virtyt» uzurpator
Që vrau shkëlqimin prapë
Mos ia ndani të sharat
Me të shara prapë

Titulli: Re: MEHMET BISLIMI - STINË E VONUAR Sun Oct 19, 2008 7:16 pm

INFORMACION
Rrugë të gjata kemi bërë
E rropatur rrugëve jemi
Kemi gjetur të vërtetën
S’po guxojmë
E s’po e themi
Ai ka informacione
Këtë stinë dimri kush e solli
Këtë stinë ashpërsie
Ne po vuajmë krejt pa nevojë
Krejt kot prej njëmendësie
Në prehrin e së vërtetës
E të vërtetën nuk po e themi
Të shenjtë sikur po hiqemi
E në fakt
Të tillë nuk jemi

Titulli: Re: MEHMET BISLIMI - STINË E VONUAR Sun Oct 19, 2008 7:17 pm

GUXIMI
Ti pjellë e manipuluar
Dashuri shfrenuar e argalisur
Mbarsje moderne e parakohshme
Klonim gjenesh bastarduar
Të erdhi dita e lindjes
Mbaje po munde
Barrën me duar
Peshë e rëndë sa bota
Fryt i lojës së papeshuar
Se ku do të nxjerr vala ty
Naivitet a mendjelehtësi
Më thuaj çka fitove
Guximin nëse e ke

Titulli: Re: MEHMET BISLIMI - STINË E VONUAR Sun Oct 19, 2008 7:17 pm

ME PRESH
Nuk është për të u habitur
Janë bërë tani shumë sylesh
Duan të zhvatin me çdo kusht
Nga kopshti i interesave
Qoftë edhe nga një presh
Ata e morën me pahir
Preshin e gjatë me mustaqe
As u skuqen as u nxinë
Nga turpi në faqe
Ma gjasë që moti
Fjalës kot i paskan thënë
Me presh në dorë
Keq e paskan zënë

Titulli: Re: MEHMET BISLIMI - STINË E VONUAR Sun Oct 19, 2008 7:18 pm

PËR KË BIEN KAMBANAT
Ka vdekur a lindur dikush
Për kë bien gjithë këto kambana sonte
Se vetëm
Atëherë kujtohen e bien ato
Sa për të lajmëruar
Një lindje
Një vdekje
A kurorë
Kaq zhurmë u dashka
Për të kuptuar
Se jeta është e shtrenjtë
Kambanat e zisë
Më
Mbi fatin e atdheut tim
Mos të kumbojnë
Mos t’i fusin më
Kambanat e zisë në lojë

Titulli: Re: MEHMET BISLIMI - STINË E VONUAR Sun Oct 19, 2008 7:18 pm

ME TOP
Dikur si të vegjël
Loznim me topin e letrës
Mbi barin e blertë
Bëheshim copë
Shaheshim e gjakoseshim këmbëzbathur
Për fitoren që do ta festonim me urrraaa
Fitoren me top
Sot lojtarët tanë
Të mbathur mirë e mirë janë
Në fushën e lojës
Mbi të njëjtin bar
Fatkeqësisht s’po dinë të lozin
Edhe pse topi
Tani
Është në anën tonë

Titulli: Re: MEHMET BISLIMI - STINË E VONUAR Sun Oct 19, 2008 7:19 pm

REXHA I NËNËS
(O mor gjok t’u këputeshin jelat...)
Mes shqelmave të legjendës
Dhe mistifikimit ndër shekuj
Kënga për dhembjen
Mbi fatin tragjik
U mitizua
Mes tragjedisë së mitizuar
Dhe ndjenjës për te
Një këngë elegjie
Mori udhë nëpër shekuj
Shtigjeve të jetës
Dhe prapë u këndua
E dhimbja nuk pushoi
Për trimin
Më barrën e dhembjes
Të vdekjeve tragjike mbi shpinë
Populli im
Kaluar shalove nëpër kohë
E koha nuk të zhveshi nga mitizimi
I vuajtjes
Zgjohu Rexha i nënës
E del
Të shtegu i lamës
Se po vijnë dasmorët

Titulli: Re: MEHMET BISLIMI - STINË E VONUAR Sun Oct 19, 2008 7:19 pm

TI NUK JE AGO YMERI
Etiketoje atë në përkujdesje
Të mos e bësh situatën komike
Ti deshe ta fyesh
Duke i thënë naiv
Mbi punën e tij pameritore në vrap
Edhe për kaq sa vrapoi
As dash as cjap
Në këto topitje ndjenjash
E situatash përgjuese
Zinxhirët e ndryshkur kush do t’i këpus
Gjuhë e shpatës zënë ngushtë
Ti nuk je ai
Që zinxhirët e Ago Ymerit
I këputë me një të rënë shpate
Pshurr në besën që i dhe Mbretit
Nëse tualet nuk ke
Tërhiqe fjalën tënde
Të mbreti mos u kthe
Nuk të falë ai më
As ty
As të nëntë shokët
Nëse pazar më të s’ke bë
Mos i qëndro besës së dhënë pa vend
Ago Ymerin mos imito
Në rrugën e imitimit do digjesh
Pluhuri i harresës mbuloi besën e dikurshme
E sot
Të vrau besa jote në nëpërkëmbje
Vërtetë e rëndë
Janë kohë tjera tani
Vet nënçmues e vet komprometues
Ago
Që nuk hyre dot në këngë

Titulli: Re: MEHMET BISLIMI - STINË E VONUAR Sun Oct 19, 2008 7:20 pm

DAMLLAJA
Mallkimet ndër shekuj të ndoqën
E ti shekujt kurrë s’i mallkove
Prandaj s’të zuri damllaja
Pse dridhesh pra
Ti që tërë jetën heshtte
E prapa heshtjes me dashje
Të vërtetën fshehe
Kohë e lindjes së dhimbshme erdhi
Mbi të vërtetën që po shpërthen
Tani më
U bë tepër vonë
Damllaja të mori ty
E thash e thënat
Morën dhenë

Titulli: Re: MEHMET BISLIMI - STINË E VONUAR Sun Oct 19, 2008 7:20 pm

MUNGOJNË
Çiftelia në odën e vjetër
Ku trimi këndonte baladat
Mungon
Arka e nuses në dhomën e saj
Aromë e ftoit ku ajo nusëronte
Mungon
Të dy i mungojnë Kosovës
Odë e dhomë aromë ftoi
Vellon tënde
Nuset e Kosovës
Në gji po e mbajnë
Rite dasmash
Në shkretni mos mbetshi

Titulli: Re: MEHMET BISLIMI - STINË E VONUAR Sun Oct 19, 2008 7:21 pm

UNIVERS
(F.Grajçevcit)
Përditë po i zvogëlojmë borxhet
Përball jetës sonë të varfër
Shprehimisht
Vitet që na takojnë po zvogëlohen
Numra në rënie
Shtrëngatat ziliqare na kanë rrethuar
Arkeologu pranë ashtit fosil
Gojëhapur heshtur e hutuar
Retë ngarkuar plot me shi
Ulur por si kësulë e bardhë
Mbi majat e larta të Golashit
Atje ku flamuri i ëndrrave tuaja
Zhurmshëm po valon
Me zvogëlimin e viteve dhe të borxhit ndaj jetës
Pengu i borxhit një ditë
Mbetur fashitur brenda vetes
Të porta me rrapëllima do na trokas
Për të marrë hakun e së vërtetës
Kush (s)më thotë
E kemi zvogëluar borxhin
Për vëllanë e motrës
Për birin e tokës
Për Fazliun
E nënë lokes

Titulli: Re: MEHMET BISLIMI - STINË E VONUAR Sun Oct 19, 2008 7:21 pm

PA EMËR
Zjarr i prushtë dhe hekur i farkuar
Nuk iu ndanë tërë jetën
Me dorë rrahu hekurin e skuqur
Me hekur davariti
Zjarrin e jetës së shprushur
Zjarrin e ëndrrës së vjetër
Zjarr dëshirash tretur
Një nishan i pa dukshëm
Gjurmë kujtimi mbetur
Zjarr e hekur
Skuqje e djegur
Shtatoren solle në sheshin e vjetër
Shesh pa emër
Pa zjarr
Pa skuqje
Pa hekur
Ëndrra pa zot
Nën përkujdesjen e djajve mbetur
Dje dhe sot
Po nesër

Titulli: Re: MEHMET BISLIMI - STINË E VONUAR Sun Oct 19, 2008 7:22 pm

KULLA E GURIT
Me daltën e hekurit godita
Gurët e jetës në rrugë
Në fërkim
Gurë e hekur
Kullat njohën zjarr ndër shekuj
Trokitje në derën e vjetër
O i zoti Kullës Oooo...
Je rrethua Oreee...
Kush troket në këtë natë
E po prishë qetësinë e territ
Pushtuesit donin t’i asgjësonin
Kullat tona nga themeli
Në kullat tona të lashta
Edhe atëherë kur na mbuloi nata
Ushtoi fort një zë i burrit
Fuqinë marrë nga kullë e gurit
O pikë falë mos të qofsha
Oreee...

Titulli: Re: MEHMET BISLIMI - STINË E VONUAR Sun Oct 19, 2008 7:22 pm

PREKAZ
Që nga sëpata e Ahmet Delisë
E deri të mitralozi i Adem Jasharit
Një shekull histori e përgjakur
Nga krenaria juaj
Të gjithë kërkojnë hise
Nga krenaria duan të marrin
Të gjithë nga pak
Në fakt
Një herë në vit kujtohen
Serish vjen marsi
E marsi ikën prapë
Drenicë kryengritëse
Me ty sot nuk merret kush
Kosovës i duhesh vetëm atëherë
Kur është me bythë në prush
Nder shekuj
Drenicë me tela varfërie rrethuar
Krenari e pa përkulur
Zhelet s’të vranë
Të vendi sëpatën
Ti gjithmonë e mbanë
Mitralozin në syrin e kuq të frëngjisë
Nga dritarja e kullës
Zë po i lëshon Ademi
Mureslit Tahirit dhe Ahmet Delisë
Ooo.... besën e kemi qyshe e kemi dhënë
Këmbë pushtuesi këtu mos me lanë
Ooohejjj...

Titulli: Re: MEHMET BISLIMI - STINË E VONUAR Sun Oct 19, 2008 7:23 pm

PAK LEK
A keni pak lek
Se më duhen
Për të ia vënë një guri
Tim biri mbi varr
Të ketë diçka të shkruar në atë gur
Edhe ai
Për dashurinë e tij të parë
Jetë e liri
Tokë e flamur
Ai ra
E unë harrova dhimbjen
Sot
Askënd turpi nuk zuri
Birit tim tek varri
Ende
I mungon një guri
Një guri

Titulli: Re: MEHMET BISLIMI - STINË E VONUAR Sun Oct 19, 2008 7:23 pm

PËR SHQIPËRI
Eh sa e sa trima
Ikën me sy hapur
E sa e sa trimëresha
Nuk i mbyllën sytë
Eh sa e sa heronj
Nuk i prehu qetësia
E sa e sa gjenerata
Prehja nuk i qetësoi
E prapë nuk u bë
Shqipëria
As sot
Kur do të arrijmë që
Dinjitetshëm ta themi
Ne
Bijtë e Shqipërisë
Jemi

Titulli: Re: MEHMET BISLIMI - STINË E VONUAR Sun Oct 19, 2008 7:24 pm

MALLI
Gërryen si lumi
Rëndon si guri
Djeg si zjarri
Joshë më shumë se ti
Moj zanë mali
Ah
Malli
Të fton më shumë se deti
Vitet ikën
Ne u mplakem
Malli që djeg për ty atdhe
I pa shuar mbeti
Ah
Malli

» Poezi që më kanë pëlqyer shumë!
» Tekste Kengesh Shqiptare!
» Cilen stine te vitit e pelqeni me shume ??
» STINE E VESHTIRE NE PALESTINE: IZRAELI MASAKRON PALESTINEZE!
» Muhamed (Mehmet) Ali Pasha