ZAGORIA "PERLA PROFIL I BISKUAR" Kristaq

Do të doja me fund
ta ktheja ballin e rakisë
dhe buzët nga “gradët”
t’i shtrëmbëroja;
ta vallëzoja urimin,
sa do të doja!

Sa do t’i bëhej qejfi
dajkes Maro,
Joshës Areti,
vajzat njëra tjetrës
do t’ia shkelnin syrin…

Gjyshja Froso
do të lëshonte nga “freri” urimin,
pjergulla e Vadhezës
do të rriste në çast kokrrën!
Eh, tatë Bukuri!
Eh, tatë Thomai!
E di, më i bukuri muaj
është Maji…

28. Urimor gjeografik

Ju po ngrini gotat
t’i trokisni me timen,
të më uroni:
“Bromp, Gëzuar!…”

“Faleminderit!
Dhe në tuajt,
me djem e vajza pëllumba!”

“Të të trashëgohen!”
nxori urimin nga kraharori bjeshka.

“Të të trashëgohen!”
më uron baca
në emër të zemrave të këtij qyteti.

“Të trashëgohen!”
më uron Valbona, Shkëlzeni.
“Të të trashëgohen!”
uron Çajupi, Dhëmbëli…

29. Një deri në Gjashtë

Edhe një herë të kam gjetur:
“Shëndeti i parë i lules
me petale lidhur.

Shëndeti i dytë:
i cicërimit të pritur!

Shëndeti i tretë:
i jetës pa menduar
kurrë vdekjen!

Shëndeti i katërt:
i të Mirës së Madhe
në të dymbëdhjetë muajt e vitit!

Shëndeti i Pestë,
më i madhi i Shëndeteve:
“Lavdi e Jezu Krishtit”

Shëndeti i gjashtë:
“Shëndeti i Luginës së Katër Grykave”!
Bromp! Gëzuar!

30. Kap qiellin e kaltëruar
diagonalisht

Kemi më se dy shekuj
që përdorim
Etikën,
duke iu drejtuar njëri - tjetrit
me “Zotëri e zonjë”,

e kemi prurë të mbartur
në tru ditën,
ndaj hëna e ndriçon
në profil të plotë Luginën…

31. Natyrale

Lugina jonë
nuk përdor parfum,
nuk lyen qerpikët,
dhe as fytyrën nuk e kremëzon

ajo lindëse natyron ditët….
Rrëfenjëza përrallëzon…
Mes ëndrra malesh
tek shpateve ngjiten…

32. Harresa e mundur

Në partiturat e ditës
ulen “notat” e vjershërimit…

Hapen të gjitha kanatat
e kopshtit të ëndrrave,
Qiejt hapin sytë,
hapin sytë diejt,
Ç’vargje dinamike
prodhojnë shpirtrat,
apo jo, e paplakura Vasillo,

harresa është e vogël
para këngëve:
“O Çajup, o vend i bukur,
o bahçe e luleve”…

përsëritet në refren
të tejëmbël.

Ylen ylberet,
hënat e plota
Në podiumin e qiparizeve
koncerton “Ansambli i Zogjve”
Ndjenjat lirojnë
dhe zbrasin shpirtrat
mbushin zemrat e të ardhurve …

me lirikat.
Këngët për Luginën
dhe lirikën e saj
shpërndahen
në të gjithë kontinentet
dhe konturohet Zagoria mbi Glob

Shfaqen misset
Anisat, Liljanat, Rovenat,
Jonidat, Mimozat
dhe thurin ëndrrat çuditërisht
edhe mbi gjemb.
Gjembi missohet…në mes lulimesh…