ZAGORIA "PERLA PROFIL I BISKUAR" Kristaq

20. Emocionet

Ç’u bënë ata çapkënë
gjer dje loznin lojëra lufte
e mbanin llastiqe,
sajonin revole me gozhdë,
plumb e shkrepse,
pandallonat linin rripave
me rrëshqitje,

u shpëtonin zëmërimit të nënave,
i linin të qetoheshin
e pastaj i përqafonin,
i puthnin pareshtur…
E ç’të kujtoj lulet e çajit
dhe trëndelinën me erë,
sa herë vija, dajua më jepte…
Emocioni më shpie
e këtej s’më sjell…

21. Horoskop fatesh

Ç’u bënë vallë ato vajza, ç’u bënë,
me shkop thane
mushkat e serta ngisnin,

ngarkuar me bar Çajupit, Hijeve,
biseda me humor bënin rrugës
dhe thurnin ëndrra rinie…

A dalin për të kuvenduar
gjyshet sofateve?…
Eh, gjyshet tona të mira
ngjajnë
me Horoskopet e Fateve…

22. Vargëzim pyetësor

Si e kam, ç’thotë xha Loni ç’thotë?
Po hallë Kristina mbahet ndopak,
Xha Vangjeli në sheh a del dot,
Xha Thimjua a dredh cigare në sofat?

Xha Kiçua a e merr si dikur këngën,
xha Mitrua a ia kthen,
po Ilia më i miri i djemve
me zërin e bukur a ia hedh?
Po joshë Aretia e nënë Lekja
a mbahen nuse si dikur?

Eh, si i tha Aretia Babë Andonit:
“Ja tek më ke, ç’bën,
pse s’më puth?…”

Po tatë Thomai, tatë profeti,
a i mbledh shokët e bisedon?
“A zbrazet me lugë deti,
Papa Jorgua të na e thotë.”

Dhe papa Jorgua u mendua,
djali i të famshmit Filip:
“Profetit Thoma s’ke ç’i thua
me ne, o burra , lot stric…”

Ç’bën vallë tani “Koloneli”?
Kë ka futur ai në lista?
E di po shkroi emrin në letër,
dikë në fshat e zë frika
O uji i kroit,
i akullt, i akullt,
Vëlla apo nip
e ke ujin e Bratit?

Kam qejf të pi
me ibrikun e Tatës,
qindvjeçarin e bronztë
s’e thinj gjumin e natës...
Shoqet e mia
veshur hijerënda
si dy pika ujë
ngjajnë me nënat...

Ndrit Evjenia
te trëndafili i bardhë,
joshë Aretia
në vallen rruazë,
ja Lush i Nakaj
me vargje të rrallë!
Xhaje Paskalia
si zonjë e rëndë...

Kiço Llania
shkreptin një këngë...

Ja Lono Mihua
po ngre dollibash,
i ka lezet fjala,
kur shtatë herë e mat!
Tatë Mitro Hila
me humor të thellë
bën kurth me pila,
vetëtimë, moj Evë!

Peço Muçi
i “vjetri” postjer,
lajmin e bardhë
tej oqeanit sjell!...

23. “Bromp, gëzuar!” burbuqezim borzilok

Vëlla, m’u trashëgofsh!
Dollia po ngrihet atje ne Jug,
ku me nusen rri krekosur…
Dije, vëlla, dhe unë po pi,
trokas gotat këtu në Veri;
jo, jo s’jam i brengosur…

24. Çast i fantazuar

Më duket sikur trokas gotat
me të gjithë, ulur në tryezën e ditës,
në xhep të vogël të xhaketës,
vë një tufë borziloku

të rritur nga dajo Lonua,
në dollibash i kam rënë pikës…

25. Dyfishimi i gazmimit

Gëzuar! Të më trashëgohesh,
nuk erdha dot, mos m’u zëmëro,
s’dua të justifikohem,
do të vijë patjetër
për të uruar…

Tatë Mitro, ty të kam gjetur!
Po bien tupanet,
një nuse e bukur Gashi
ja tani kaloi,
mes gëzimit
si hënë bukuroshe ngjau,
me shtatin e derdhur nimfat zilisi…

26. Jam atje…

Në dasëm jam me shpirt,
atje ku këngës zagorite
ja marrin burrat,

gratë valles ja marrin shtruar
dhe të gjithë veshin rrobat
më të mira, më të bukura, …

27. Urim i vallëzuar

Sa dëshirë kam të futem
në gjirin e pranverës së begatë…
Do të doja në krye të avllisë
të tundja shaminë,…

Ej, të puthurën “ilegale”
ta zije mat!
Me lëvizjet dinamike
zemrat dasmorëve t’ua ngroja…