"Mështekna e "Djalltë" nga Kristaq F. Shabani

Dita e Plejadës

Mështekna e "Djalltë"
nga Kristaq F. Shabani
shkruar në qytetin e Bajram Currit në vitin 1980


MESHTEKNA E “DJALLTË”

“Ta lumsha atë sy, oj burrnesha ime dhe E ATYRE, Gjysmën e syrit me gjithë Syrin...”
Sytë e vënë si binokla bien nga njerkëza, krisin si qelq konkav . “Ta puthsha atë dorë që prek prushin e nxehtë dhe kthehet në refren...” “Është një mështeknë diku. Gjysmën e trupit ia ka ndarë më dysh Vilari i Verdhë, por gjysma e mështeknës ka dygjysmëbijëza...

Limfa e tyre si gjak lëviz nëpër trupin një. Thanë se e priste tharja; thanë se kanibalët ishin mprehur të thithnin LIMFËN- GJAK; thanë dhe Legjendat dridhnin belin hollak;
thanë dhe për inat të tyre të katra jepnin dhe merrnin me trungun amë...

Erdhën dhe u prenë dorën për të marrë unazat*, erdhën dhe u prenë veshët* për të marrë vathët*, gurmazët* për të bërë pronë stolitë e shtojzovalleve...
Erdhën dhe bajonetat e shkaut*1) mijëvjeçar shpuan barqet e nënave që fara e keqe të zhdukej,.. Harresa të mbillte Lulet e “MOSHARRESËS”... Por, çuditërisht duart rimerrnin unazat, Veshët vathët e florinjtë, Gurmazet u kthenin qafave të nimfave stolitë...

Nënat lindnin fëmijët në bjeshkë midis boronicave*...
Zajet e lumenjve buronin nën mështeknë. Fijet e barit krenoheshin... Njerëzit e “të ardhurit” rritnin bishtin e rudimentuar... Kullat merreshin vesh me kodin e tyre me Mështeknën,... Në burimin poshtë saj vranë njëzetë vitet e Zojës*, e ndaj Nuni e pagëzoi kroin me të njëjtin emër,...
Vinin dhe iknin të trembur deri në kufijtë e Maksimumit,... Në kurmet e tyre frika rregjistronte elementë fatalë. Temperaturat ziheshin si dy grinjare,... Më i Mënçuri i shkaut trumbetonte: “O i madhi i Krajlve*, dëmi na vjen nga një Pemë e Madhe me trung të fuqishëm, e cila çuditërisht ka zgjerim më të madh se shumë “aizbergë”, që e ndriçon përveç Diellit që duket edhe një diell tjetër përveç Hënës që njohim dhe një Hënë tjetër, përveç Yjeve që njohim edhe disa të tjerë, përveç... Pema ka rrënjë të jashtëzakonshme futur në nëntokë dhe deri ku ato shtrihen ka vetëm një profil,...

Krajli e ndërpreu Profetin dhe në zemërim të madh i tha: “ Ku është ajo pemë e mallkuar t’i pres trungun që sot?!” Profeti iu përgjigj: “Ajo pemë nuk pritet se ka trungun në katër shtete...”
“Mos u çmende, Profet, ku ka trungje të tilla!”
Dhe një qeshje qesendisëse shpërtheu:
“U marrua Profeti, u marrua Profeti... Koka t’i pritet para pemës!”
Por, s’ishte e thënë, zëmërimit i vuri stërkëmbth logjika;
“Kush e dinte Pemën fantazmë, përveç atij, Profetit?!...”
“E keqja e madhe është se po preve pjesën e trungut nga ana që e kemi pronë, vetëm pas pak orësh prapë do të jetë rritur”.
“Kjo qenka pemë kuçedër me katër kokë, po i preve njërën prapë ringjallet... Kjo s’qenka pemë, por pemë e Djalltë!...” Krajli nxihej në fytyrën e nxirë, brenda tij vullkane që veç nxirrnin llavë, “Si mund të mposhtte Mështeknën e Bardhë?!...”

“Profet, më thuaj ku është kjo Pemë, të nis sejmenët për ta prerë...”
Profeti s’u nxitua... U mendua pak, pastaj hodhi sytë mbi hartë,... Një shenjë vendosi në një Majë. Mështekna papritmas tek shenja profetike u lartësua mbi hartën e Murin e ndriçuar... As në skenat më të bukura s’kishte ndodhur të shfaqej sakaq një Aktore...
“E dëgjova bisedën tuaj fshehur tek harta, ndaj papritur vetë u shfaqa,... Të pres tek vendi i lindjes kur të duash; të pres plot gjethe, paçka se po afron vjeshta,... Gjethet e mia s’janë kurrë të verdha!... Të pres siç të kam pritur në vite, shekuj, paçka se ty pak jetë të ka mbetur, o Krajl i prapë!” Krajli s’po besonte te sytë, sa fliste pema shfaqej një Shqiponjë,... “Çfarë lidhje të kishte kjo pemë me këtë simbol?”

U mat të fliste, por s’mundi. Pema nga Harta sakaq humbi. Dhe xhindosja i erdhi në çast:
“Profet, mos po luan Pemën e lartë?... Mos po më sjell në Hartë magjinë, që frikë e madhe të më kapi,dhe i tulatur të mbetem në brinjë,... Shqiponja kufijtë e saj të hapë?”
Dhe ndodhi si në çuditë rruzullore Mbikonfigurimi u kontura real.
Buzëqeshte MËSHTEKNA E BARDHË, bashkonte rrënjëzimet e mënjanuara...
S’kishte ndodhur as në legjenda, Bijëza gjente nënën e saj.

Shënim:1. * armikut,
*
Në këtë rast përmendet veprimet shtazarake të serbëve ne Malësinë e Gjakovës, të cilët këto ndërmarrje gjaksore i kanë realizuar gjatë tentativave të shumta për të pushtuar trojet legjitime shqiptare.
Autori ka shërbyer në këtë trevë.
* Një lloj bime, e cila ka vlera kurative.
* Në Mejdan në pjerrësitë e Malit të Begaj, afër malit të Shpikut është një krua, që quhet “Kroi i Zojës”, i cili ka historinë e tij të trimtë.
* Udhëheqësi i serbëve, i cili vihej në krye të formacioneve luftarake për të realizuar operacionet pushtuese. * kurm- trup.

Marre nga Antologjia vetiake "VIRTYTI I GENJYER" i autorit , gjashtetip