OVLUÇK-ja kërkon miratimin e Projektligjit

Organizata e Veteranëve të Luftës së Ushtrisë Çlirimtare të Kosovës përmes një letre drejtuar organeve Kryesisë së Kuvendit, Komisionit për Legjislacion dhe shefave të grupeve parlamentare thekson se nuk do të nuk pranojë asnjë justifikim që do të vononte miratimin në tërësi të projektligjit për statusin dhe të drejtat e familjeve të dëshmorëve, invalidëve, veteranëve dhe pjesëtarëve të UÇK-së dhe familjeve të viktimave civile të luftës apo shtyrjen e afatit të hyrjes së tij në fuqi.

Përmes letrës, OVLUÇK kërkojnë nga Kuvendi i Kosovës që puna rreth projektligjit të përshpejtohet dhe të mos politizohet, në mënyrë që i njëjti të vihet në zbatim nga 1 janari 2011.

“Duke e parë se koha po ecën, ndërsa projektligji ende nuk u procedua në seancë parlamentare, ne shprehim shqetësimin e thellë për mënyrën e trajtimit dhe diskutimit të projektligjit, në emër të të gjithë anëtarësisë që ne e përfaqësojmë si Organizatë”, thuhet në letër.

Edhe pse shprehën të vetëdijshëm për situatën politike në Kosovë, ata vlerësuan ne nuk pranojnë asnjë justifikim që do të vononte miratimin në tërësi të projektligjit.

“Çdo shtyrje e mëtutjeshme do të konsiderohet si hipokrizi politike, mosrespekt ndaj luftës çlirimtare të UÇK-së dhe veteranëve në përgjithësi. Durimit tonë i ka ardhur fundi.
Ne mbesim me shpresë që nuk do të ketë asnjë vonesë, megjithatë, ne jemi duke i diskutuar format dhe mënyrat e veprimeve tona të mëtutjeshme”, thuhet në letër.