Letër e hapur Kacelares Merkel nga Astrit Reçka

Letër e hapur

Tepër e nderuara, zonja Anxhela Merkel!

Kancelare Republikës Gjermane.

Duke iu uruar, në radhë të parë, një shëndet të plotë, për të mirën, si Tuajën, ashtu edhe të vet popullit mik gjerman, marr guximin t’Ju shkruaj, unë, një ish emigrant, në Republikën Gjermane, gjatë viteve 1992, 93. Atje, ku jetova dhe punova, krijova një respekt reciprok, jo vetëm me ata, që punova, por edhe me njerëz gjermanë edhe të tjerë, të thjeshtë, ose funksionarë, që njoha, gjatë kohës të qëndrimit tim dhe njëkohësisht, më vonë këtu në Shqipëri.

Si njëzet vjet më parë, ëndrra e popujve për liri dhe demokraci u realizua dhe kjo përkon me mbarimin e “Luftës së Ftohtë“ dhe rënien e “Murit të Berlinit“. Kjo ishte një ngjarje e madhe, jo vetëm për popullin mik gjerman, por edhe për vetë popullin shqiptar dhe gjithë popujtë e tjerë, për të ndërtuar një shoqëri demokratike.

Është e vërtetë se Muri ndarës i Berlinit u shemb, por u shemb vetëm fizikisht? Apo u shemb edhe ideologjikisht, moralisht. A duhet që, ky mur edhe sot mbas njëzet vjetëve të shembjes ideologjike, të ekzistojë akoma koncepti i murit ndarës, duke ndërruar formën e tij:

“Popuj që, e meritojnë të ecin krah për krah vendeve të zhvilluara me një demokraci më të lartë dhe popuj që nuk e meritojnë, këtë rrjeshtim“.

Marr shkas nga përgjigjia e fundit e Këshillit të Europës, për “Vizën e Kuqe“, të dhënë popullit shqiptar, në drejtimin e lëvizjes së lirë të tij. A meriton vallë një dënim të tillë kolektiv një popull që, më shumë se, një e treta, punon dhe jeton jashtë kufijve të atdheut të tij dhe që është integruar në jetën Europiane dhe më gjerë, duke shpalosur vlerat më të mira, cilësitë më të mira të tij?

A mendoni me të vërtetë, vallë, që dhënia e një të drejte të tillë popullit shqiptar, do të prishë vlerat demokratike dhe të përparuara të familjes së përbashkët të popujve të tjerë evropianë? A i takon një populli, që me një histori të dhimbëshme, por të lavdishme, gjithmonë paqedashës dhe liridashës, sot në shekullin e njëzet e një, njëzet vjet pas rënies së murit të Berlinit, të quhet “Delja e Zezë“ evropiane

Tepër e nderuara, Shkëlqesi!

Duke e konsideruar, jo vetëm unë, por mbarë populli shqiptar, miqësinë ndërmjet dy popujve tanë, si një urë lidhëse të fortë, mbetemi me shpresë se, do të merrni vetë inisiativën në dorë për të drejtat e shqiptarëve, jo vetëm brenda kufijve, por edhe jashtë tyre.

Duke kujtuar një thënie të një miku tim gjerman:

“Shqiptarët, më tepër se, Markat gjermane, sot më tepër se kurrë, kanë nevojën e mbështetjes së fuqishme, jo vetëm nga populli, por edhe nga shteti Gjerman, që të ecin në rrugën e demokracisë dhe të zhvillimit“.

Marr shkas, jo nga shqyrtimi i përgjigjes politike dhënë nga Këshilli i Evropës, por nga shikimi i situatës nga ana morale, jo për brezin tim, natyrisht, por për brezin e fëmijëve tanë dhe atyre që do të vinë nga pas që, nesër ata, kudo që të jenë

Të jenë krenarë që janë Shqiptarë!

Të kenë të drejtë të mendojnë, mësojnë dhe punojnë si qytetarë të barabartë Evropianë!

Shqipëria është një vend i bukur dhe i pasur, jo vetëm nga resurset natyrore, por mbi të gjitha ato shpirtërore!

Me respekt të thellë për JU dhe Popullin Mik Gjerman

Themeluesi i Shoqatës së Miqësisë, Shqipëri - Gjermani.

Dega Gjirokastër

Astrit Reçka

» Dy skicime interesante nga Astrit Reçka
» Veteranët e Luftës së Kosovës adresojnë letër të hapur Veter
» Feja apo Kombi.?
» Drejt, hapur, qartë!
» Anthology poetical “KORSI E HAPUR” (OPEN LANE” 3