Berisha prap kunder Bashkimit kombetar!

MOS luani me Shqyptaret dhe shtetin e tyne, ju pret i njeti fat si aldo kriminelit

Deputeti i PS, Erion Braçe, i cili njihet si një nga mbështetësit kryesor të Edi Ramës, konsiderohet si një nga njerëzit e besuar të bandës kriminale të Aldo Bares dhe si një sekser i kësaj bande në aferat ekonomike të ndërmarra prej saj deri pesë vjet më parë. Gjithçka është zbardhur nga një sërë bisedash të përgjuara pesë vjet më parë nga Prokuroria italiane mes anëtarëve të bandës famëkeqe të Aldo Bares. Në këto përgjime emri i njeriut të afërt të Ramës, Erion Braçe, citohet si garanti i tenderave që kjo bandë kërkonte të fitonte dhe si kompensim anëtarët e bandës i premtonin si përfitim një sërë pikash karburanti përgjatë autostradës.

Braçe ka dalë garant tek njëri prej anëtarëve të bandës së Aldo Bares për fitimin e tenderit të autostradës Lushnje-Fier, ndërsa vetë Erioni do të përfitonte në ndërtimin e pikave të karburantit përgjatë autostradës. Ky fakt është zbuluar nga Prokuroria italiane gjatë përgjimit të bisedave të anëtarëve të "Bandës së Lushnjes". Përgjimet e realizuara nga Prokuroria italiane për anëtarët e "Bandës së Lushnjes" kanë nxjerrë në dritë edhe përfshirjen e disa politikanëve të majtë, njëri ndër ta është edhe Erion Braçe.

Në një bisedë të përgjuar më 11 prill 2004, mes Alfred Shkurtit (Aldo Bare), i cili një ditë më parë u ekstradua nga Turqia, dhe Alxhi Nallbanit, diskutohet mundësia e fitimit të tenderit për ndërtimin e rrugës Lushnje-Fier dhe marrja e ekskluzivitetit për vendosjen e disa pikave të karburantit përgjatë autostradës. Në diskutimet për tenderat, inkuadrohet dhe emri i Erion Braçes, deputet i Partisë Socialiste. Sipas kapitullit 18, faqe 398, të dosjes penale të Prokurorisë italiane, eksponenti socialist që në atë kohë drejtonte dhe gazetën "Zëri i Popullit", në komunikimin me pjesëtarë të organizatës së dyshuar kriminale, kishte deklaruar se gara e tenderit do të fitohej nga disa sipërmarrës të njohur nga ai. Prokurori italian Dionixhi Tibone, ka përfshirë në dosjen për pjesëtarët e "Bandës së Lushnjes" edhe tekstin e zbardhur të bisedës së përgjuar. Biseda e regjistruar nga autoritetet italiane të drejtësisë, mban datën 11 prill të vitit 2004 dhe u kap në numrin e Alxhi Nallbanit. Ai kreu një bisedë telefonike me Aldo Baren, i njohur dhe si Alfred Shkurti, që posedonte një numër turk. Biseda përqendrohej në përpjekjet për të fituar tenderin për ndërtimin e autostradës Fier-Lushnje. Në lidhje me këtë argument, Nardi (Renardo Nallbani), vazhdonte me faktin se kishte folur me Erion Braçen. Ky i fundit i kishte treguar se gara e tenderit do të fitohej nga disa sipërmarrës italianë, të njohur nga ai. Biseda vijonte mbi projektin që kishte organizata kriminale, "të bazuar në shtytjen nga deputeti socialist Braçe, me synimin për të fituar të drejtën ekskluzive të instalimit, mbi të gjithë rrjetin autostradal në diskutim, të disa distributorëve të benzinës të administruar direkt nga grupi kriminal".

Komunikimi mes kapobandës Aldo Bare dhe Alxhi Nallbanit, është ndalur dhe për udhëtimin në Gjermani që Alxhi kishte bërë me Renardo Nallbanin, i quajtur Nardi. Në këtë pikë biseda bëhet e paqartë, pasi Alfred Shkurti tregon se ka patur një shkëmbim fjalësh me bashkëqytetasin i quajtur "doktori", i cili po i linte mënjanë interesat e grupit të tyre. Alxhi replikon se në momentin e rikthimit në tokën shqiptare "do të merrej me doktorin". Aldo Bare cilësohet nga Policia dhe Prokuroria shqiptare si kryetar i një organizate kriminale, e njohur "Banda e Lushnjes". Grupi kriminal me të paktën 20 anëtarë, disa prej të cilëve po gjykohen në Tiranë dhe të tjerë në Torino të Italisë, akuzohet se ka kryer një seri vrasjesh dhe krimesh të tjera të rënda gjatë dekadës së kaluar, kryesisht në Lushnje dhe Tiranë.

Aldo Bare u arrestua nga Policia turke në Ankara më datë 25 mars 2006, si rezultat i bashkëpunimit midis policisë shqiptare dhe asaj turke, dhe në përfundim të procedurave u ekzekutua vendimi i ekstradimit për në Shqipëri. Ai u ekstradua të mërkurën paradite nga Turqia i lidhur me zinxhirë dhe pranga në duar dhe këmbë. Bare u dërgua nën masa të rrpeta sigurie në paraburgimin 313.

Pjesë e materialit hetimor për bisedën e zhvilluar mes Aldo Bares (Alfred Shkurtit) dhe Nallbanit: "Më datën 11 prill 2004, në orën 22.53, në numrin 338/8837418, në përdorim të Alxhi Nallbanit, i quajtur Xhili, u kap një telefonatë drejt numrit turk 0090/ 5442172483, në përdorim të Alfred Shkurtit. Gjatë bisedës, ky i fundit e pyet Alxhin, nëse i ka përfunduar "punët", Alxhi përgjigjet se ka bërë "diskutimet", vazhdonte duke sqaruar se do të qëndronte në Itali edhe për dy ose tre ditë të tjera. Më pas i rrefen Shkurtit për udhëtimin në Gjermani të bërë me Renardo Nallbanin, i quajtur Nardi, duke sqaruar: "shkova për të blerë 2 kamionë, me një rrugë, dy punë, e ke të qartë?" Alxhi më pas i sqaron Shkurtit se në Itali jetohet shumë mirë, por ky i fundit i përgjigjet se "në Itali ka shumë shqiptarë dhe të duket sikur je në Tiranë". Shkurti tregon se ka patur një shkëmbim fjalësh me bashkëqytetasin e tij i quajtur "doktori", i cili po i linte mënjanë interesat e grupit të tyre, pra Alxhi replikon se, në momentin e rikthimit në tokën shqiptare "do të merrej me doktorin". Shkurti, gjithnjë në kuadër të dialogut të mësipërm, përsëriste nevojën, nga ana e organizatës, për të "siguruar" garën e tenderit për ndërtimin e autostradës Fier-Lushnje. Në lidhje me këtë argument, biseda vazhdohej nga Nardi, i cili sqaronte se kishte folur me ish-gazetarin Braçe, eksponent i lartë në Partinë Socialiste, i cili i kishte treguar se gara e tenderit do të fitohej nga disa sipërmarrës të njohur nga ai. Biseda vazhdonte mbi projektin që kishte organizata kriminale, të bazuar në shtytjen nga deputeti socialist Braçe, me synimin për të fituar të drejtën ekskluzive të instalimit, mbi të gjithë rrjetin autostradal në diskutim, të disa distributorëve të benzinës të administruar direkt nga grupi kriminal".

Një ditë pas ekstradimit nga Turqia, Alfred Shkurti i njohur si Aldo Bare është paraqitur dje, në Gjykatën e Krimeve të Rënda, ku është zhvilluar seanca e parë gjyqësore ndaj tij. Kreu i "Bandës së Lushnjes" është dërguar në Gjykatë përmes tunelit të nëndheshëm që e lidh me Burgun 313, ku është njohur me të gjitha akuzat që rëndojnë ndaj tij. Në një seancë të shkurtër, e cila zgjati për rreth 15 minuta, Aldo Bare është njoftuar për masën e sigurisë së "Arrestit me burg" dhënë ndaj tij në mungesë nga Gjykata e Krimeve të Rënda. Gjatë kësaj seance, e zhvilluar pa praninë e medias, është bërë verifikimi i gjeneraliteteve të të pandehurit. Ndërkohë, mësohet se Bare nuk ka dhënë ndonjë deklaratë. Trupi gjykues e ka njohur Baren me numrin e madh të akuzave që rëndojnë mbi të, duke filluar nga krijimi i organizates kriminale, në më tepër se 20 vrasje, rrëmbim personi, shkatërrim prone, dhunim varresh, trafik droge, si dhe kryerje të veprave të tjera penale në bashkëpunim nga organizata kriminale. Seanca ndaj Aldo Bares u zhvillua nën masa të rrepta sigurie nga forcat e policisë. Aktualisht, Aldo Bare është duke u proceduar në Gjykatën e Krimeve të Rënda.

Aldo Bare u ekstradua në Shqipëri një ditë më parë nga Turqia, ku ishte arrestuar që në vitin 2006. Nëpërmjet një deklarate për mediat, Policia e Shtetit bëri të ditur akuzat e rënda që rëndojnë mbi Aldo Baren dhe bandën e tij. Sipas Policisë së Shtetit, Aldo Bare dhe organizata e tij kriminale akuzohen ndër të tjera:

- Për vrasjen dhe dekapitimin (prerjen e kokës dhe shëtitjen në publik) të Artur Dajës në qytetin e Lushnjes;

- Vrasjen në qendër të qytetit të shtetasit shqiptaro-maqedonas, Xhevat Demiri;

- Vrasjen për shkak të cilësive të veçanta, mbetur në tentativë, të shefit të Komisariatit të Policisë Lushnjë, Sinan Meta;

- Vendosjen e lëndës eksplozive me telekomandë në stadiumin e futbollit të qytetit të Lushnjës;

- Vrasjen në vitin 2000 të inspektorit të Policisë Kriminale, Klejdi Bano;

- Vendosjen në vitin 2001 të eksplozivit në banesën e inspektorit të Policisë së Rendit, Idriz Shuli;

- Vrasjen në janar të vitit 2005 të Klodian Haxhiut;

- Vendosjen në mars të 2005 të eksplozivit në banesën e një punonjësi policie në rrugën Don Bosko në Tiranë;

- Vendosjen e minës me telekomandë në makinën e ish-drejtorit të Policisë Kriminale, Xhavit Shala;

- Vrasjen në vitin 2005 të biznesmenit Baki Taullaut;

- Si dhe disa vepra të tjera penale, të cilat janë në hetim, për vrasjen e ish-kryetarit të SHIK-ut, të rrethit Lushnjë, Bashkim Shkurti, vrasjen e ish-nënkryetarit të Bashkisë të qytetit Lushnjë, Drago Voshtima, vrasje këto të kryera në vitin 1998.

Gjithashtu, Aldo Bare akuzohet për drejtimin e njërit prej rrjeteve më të fuqishme të trafikut ndërkombëtar të drogës në drejtim të Europës Perëndimore. Aldo Bare, i ekstraduar të mërkurën nga Turqia, nën vëmendjen e forcave të shumta të policisë, si dhe forcave të "RENEA-s", ndodhet në Burgun e Sigurisë së Lartë, Nr. 313 në Tiranë. Kreu i Bandës së Lushnjes, Alfred Shkurti, i njohur ndryshe Aldo Bare, mbërriti në Burgun 313 nën vëzhgimin e strukturave të Rendit, makinave të shumta të policisë që shoqëruan automjetin e blinduar. Ai u arrestua në mars të 2006-ës në Stamboll të Turqisë, pasi u kap me një pasaportë maqedonase të falsifikuar. Në atë kohë ai kishte dy arreste ndërkombëtare, atë të Shqipërisë për krijim të bandës së armatosur dhe një seri vrasjesh në Itali, si dhe për trafik ndërkombëtar të drogës.