Kusturica largohet nga festivali i filmit në Antalia

Beograd, 10 tetor – Regjisori Emir Kusturica, siç raportojnë mediat serbe, ka deklaruar sot se do të largohet nga festivali i filmit në Antalia të Turqisë, ku ishte anëtar i jurisë dhe mysafir nderi, për shkak të polemikave që ka nxitur në opinionin turk ardhja e tij në këtë festival.

"Këto janë metoda barbare dhe primitive”, ka deklaruar Kusturica para gazetarëve në Antalia, ku po mbahet festivali i 47 i filmit “Portokalli i artë”.

Sipas agjencisë turke të lajmeve Anadollia, Kusturica ka thënë se nuk do të marrë pjesë në një punëtori të organizuar në kuadër të Festivalit, siç ishte e paraparë, dhe do ta lëshojë menjëherë Turqinë.

Ministri turk i Kulturës, Ertugrul Genaj, ka kritikuar sot Kusturicën për shkak të “qëndrimeve kontraverze” të tij, gjatë luftës në Bosnje, duke shtuar se nuk do të vijë në Festival, ku Kusturica parashihej të ishte edhe anëtar i jurisë.

"E konsiderojë ministrin turk armik, sepse ai këtë e meriton”, ka thënë Kusturica, raporton agjencia serbe Beta.
Rreth pjesëmarrjes së Kusturicës në Antalia të shtunën i pari ka reaguar regjisori i njohur dhe fituesi i çmimit Ariu i artë, Semih Kaplanoglu. Ai ka vendosur që të bojkotoj festivalin e filmit në Antalia të Turqisë për shkak se organizatorët kanë ftuar Emir Kusturicën që të jetë anëtarë i jurisë.
Regjisori i shpërblyer turk, i cili me veprën e tij “Mjalti” ka marrë pjesë në Festivalin e Filmit në Sarajevë, ka thënë se nuk do të marrë pjesë në Festivalin e Filmit ”Portokalli i artë” në Antalia, në shenjë proteste për shkak të thirrjes së Kusturicës.
Në një deklaratë të dhënë me shkrim, regjisori turk ka theksuar se “ngjarjet në Bosnjë dhe Hercegovinë ndërmjet 1992-1996 gjyqet ndërkombëtare i kanë definuar si gjenocid dhe krim kundër njerëzimit, dhe se pjesëmarrësit në këto krime janë dënuar ose janë në proces”.
Në edicionin e 47-të të festivalit “Altin Portokal” (Portokalli i artë) në Antalia, do të shfaqen 191 filma nga 35 vende. Pritet që në këtë festival të marrin pjesë 1200 mysafir, të profileve të ndryshme. Festivali do të zgjasë deri të enjten.


http://www.kohaditore.com/index.php?cid=1,9,36719