Papunesia e te rinjeve ne Kosove

Të rinjtë luajnë rol të rëndësishëm në të ardhmen ekonomike të çdo vendi. Vetëpunësimi ofron opcione shtesë të karrierës për të rinjtë dhe inkurajon ata që të gjejnë zgjidhje, ide dhe mënyra të reja për të bërë gjërat.

Si i tillë, vetëpunësimi është shëndërruar në pjesë përbërëse të strategjive nacionale të hartuara për adresimin e sfidës së punësimit të të rinjve.

Arsimi, aftësimi, këshillimi dhe orientimi u zhvillojnë të rinjve ato aftësi që janë funkcionale për të reaguar në mënyrë inovative dhe efektive ndaj biznesit, punësimit dhe shoqërisë në tërësi.

Të rinjtë duhet të inkurajohen që të mësojnë se si t’i gjejnë mundësitë, si të kërkojnë informata, si të zgjidhin probleme dhe si të punojnë në ekip – me një fjalë se si të bëhen “ndërmarrës”.

Ndërmarrësia e të rinjve përbëhet nga një sërë konceptesh, që nga promovimi i vetëpunësimit dhe zhvillimi i biznesit, e deri te strategjitë e të mësuarit që u mundësojnë të rinjve aftësitë e ndërmarrësisë.

Këtu zakonisht përfshihet edhe kultivimi i gatishmërisë për të hyrë në aktivitete të reja, aftësia për të identifikuar mundësitë dhe ajo për planifikim, zhvillimi dhe implementimi i planeve të veprimit, si dhe kapaciteti për të punuar si pjesë e një ekipi dhe për të komunikuar me njerëz tjerë.

Një nga mitet më të shpeshta për themelim biznesi është se për të qenë i suksesshëm në biznes njeriu duhet të zbulojë diç të re.

Përkundrazi, shumica e bizneseve janë të suksesshme sepse kanë gjetur mënyra të përmirësimit të produkteve ose shërbimeve ekzistuese për të cilat konsumatorët dëshirojnë dhe janë të gatshëm të paguajnë.